Ամենապատիւ եւ Գերերջանիկ Հոգեւոր Տէրը կը շնորհաւորէ Լիբանանեան բանակին տօնը

Տանն Կիլիկիոյ Կաթողիկէ Հայոց Ն.Ա.Գ.Տ.Տ. Ռաֆայէլ-Պետրոս ԻԱ. Կաթողիկոս-Պատրիարքը շնորհաւորական ուղերձ մը յղած է Լիբանանեան Բանակին տօնին առիթով: Նամակին մէջ, Ամենապատիւ Հոգեւոր Տէրը, Հայ Կաթողիկէ Պատրիարքութեան անունով, կը փոխանցէ իր ջերմ շնորհաւորութիւններն ու մեծ յարգանքը բանակին հրամանատարութեան ու բոլոր անդամներուն՝ բարձր գնահատելով անոնց հերոսական դերակատարութիւնը ի նպաստ Լիբանան հայրենիքին պաշտպանութեան: Ան կը յայտնէ, թէ այս նշանակալից տօնը ազգային իսկական ոգիին եւ անսահման զոհաբերութեան ողջ մարմնացումն է:

Գերերջ. Հոգեւոր Տէրը կ'աւելցնէ.«Զինուորական ծառայութիւնը մեծագոյն պատիւն է ամէն քաղաքացիի համար: Բանակին անսահման զոհողութիւններն ու մնայուն ջանքերը ցոյց կու տան անոր բացարձակ եւ հզօր հաւատարմութիւնը: Ձեր ամուր կեցուածքով ու երիտասարդ բազուկներով կը պաշտպանէք հայրենիքին արժանապատուութիւնն եւ ազատութիւնը»:

Հոգեւոր Տէրը կը շեշտէ, որ ազգային բանակը միայն զինուորական ոյժ մը չի ներկայացներ, այլ նաեւ ազգային միասնականութեան ու հաստատակամութեան անխախտ խորհրդանիշն է, ինչպէս նաեւ անոր տարած զոհողութիւնները՝ հպարտութիւն ու պարծանք են բոլոր քաղաքացիներուն համար:

Նամակի աւարտին՝ Գերերջ. Հոգեւոր Տէրը աղօթք կը բարձրացնէ առ Աստուած, որ պահէ ու պահպանէ բանակը եւ զայն միշտ ուղղէ ի սպաս հայրենիքին ծառայութեան ու պաշտպանութեան:

Աղբիւրը` Հայ Կաթողիկէ Պատրիարքութիւն